Agzul

Adlis asnawalan d allal agejdan i tutlayt am yisegzawalen, idlisen n tjeṛṛumt…, deg tmaziɣt ɣas ma ugten yimahilen yemmugen ɣef tesnawalt ladɣa tasnalɣa, maca nceyyaren gar tesɣunin d tezrawin (master d dukṭura), s umata ulac adlis id d-yesnegrawen akk iferdisen i icudden ɣer tesnawalt.
Amagrad-a ad yili d azwir i tigin n udlis asnawalan ɣef tutlayt tamaziɣt (taqbaylit). Iswi-nneɣ d asenked n yigusa igejdanen iɣef ara d-yebnu udlis asnawalan.

Awalen-isura

Tasnawalt, amawal, awal, tasnalɣa, tasnamka.

Tazwert

Amagrad-a ad yili d azwir i usenfar n tigin n udlis asnawalan amaziɣ (tantala taqbaylit), deg-s ad neɛreḍ ad d-nessenked iswiren igejdanen iɣef yres uzraw n wawal. D tidet, tantala taqbaylit tella seg zik d lsas n waṭas n leqdicat isnawalen. Deg tilawt kra n leqdic i icudden ɣer uzraw n wawal ; tuddsa-s, asileɣ-is, aẓar-is, tisenfal-is anamek-is… yekcem deg tesnawalt. Ɣef waya, tasnawalt teṭṭef ameqqran yerna d agejdan gar yifurkawen yemgaraden n tesnilest.

Deg taɣult n tmaziɣt wisen ma nezmer ad d-nemmeslay ɣef tesnawalt neɣ ala, mebla cekk, aṭas n yimahilen i gan yismazaɣen d yinelmaden isdawanen, imahilen-a s wudem neɣ s wayeḍ kkin deg taɣult n tesnawalt. Tizrawin, idlisen, neɣ imahilen i d-yewwin ɣef tesnalɣa akked tesnamka ur zmiren ad ttwasisemlen berra n taɣult n tesnawalt.

Maca, nnig n umahil i iga (M. A. Haddadou, 2011) « Précis de lexicologie Amazighe » ar ass-a, ur nwala ara kra n leqdic yemden i iḥuzan tasnawalt akken iwata. Tutlayt dɣa akken ad tessaweḍ ɣer yisem-a n tutlayt, yessefk fell-as ad tesɛu akk ttawilat i tettuḥwaj tutlayt gar-asen adlis asnawalan amatu. Deg unamek-a, asteqsi-nneɣ : d acu-ten yiferdisen akk i izmer ad iḥaz uzraw n wawal ?

Akken ad nessiweḍ ad dnerr ɣef usteqsi-a, ad nessismel amahil-a ɣef kraḍ n yiswiren :

• Amezwaru ad yili ɣef tesnawalt d tussna, tilisa-s, assaɣen-is.

• Wis sin ad yili ɣef uswir asnalɣan n wawal.

• Wis kraḍ ad yili ɣef uswir asnamkan n wawal.

Ɣer tama n yal aswir ad d-nefk tabadut n yimekta isura i icudden ɣur-sen.

Tasnawalt, s umata d tussna i d-yelhan d uzraw n talɣiwin d yinumak yemgaraden i izmer ad yesɛu wawal deg tutlayt. D tussna daɣen yesɛan assaɣ srid d tseknawalt akken i tt-id-yesbadu G. Mounin (2004 : 203) « Tasnawalt tettbeyyin-d tussna i izerwen amawal neɣ asnirem, tettbeyyin-d daɣen axemmem aẓrayan ɣef wuguren i d-yettilin deg tigin n yisegzawalen »1

Γer F. Sadiqi (1997 : 238) tasnawalt ur tesɛi assaɣ d talɣa n wawal, terza kan azraw n yinumak-is akken i d-yebder, « Tasnawalt d tussna i d-yelhan d tesleḍt tasnamkant n wassaɣen yemgaraden n unamek yellan gar yimudmen (les paradigmes) imawalen n tutlayt. Ɣef waya, tasnawalt teqqen srid ɣer tseknawalt, deg unamek-a tussniwin-a ta tettkemmil ta »2 Γer Sadiqi leqdicat yemmugen deg taɣult n tesnawalt n tmaziɣt yessefk ad ilin rzan kan azraw n unamek, ɣur-s talɣa n wawal ur tesɛi azal, imi deg tmuɣli-is, d abeddel n unamek n wawal i d-igellun s ubeddel deg talɣa.

Tasnawalt, d taɣult i ibnan ɣef sin n yiswiren isnilsanen, tasnalɣa akked tesnamka. Deg tilawt, iswiren-a wa yettkemil wa. Ma nmuqel ɣer wayen i d-yebder A. Meillet (1921, 30) deg udlis-is « Linguistique historique et linguistique générale”, ɣef wayen s wacu yuddes wawal, yettwabder-d sɣur Alise Lehman & Françoise Martin-Berthet (1998 : 01), anda i d-yenna « Awal yettmaga-d s usdukkel n unamek yettunefken i tegruma n yimesla i izemren ad yili kra n useqdec ajerruman »3

Ilmend n tbadut-a, awal ad yili ihi d tayunt yebnan ɣef talɣa akked unamek. D tigejdit iɣef tres tnekti n uzmul asnilsan akken i tt-id-yesbadu (F. de Saussure, 2002), azmul asnilsan, yuddes s sin n wudmawen, ummsil akked wunmik :

• ummsil, d idis asnalɣan n uzmul i d-yemmalen agbur asnamkan, neɣ d tugna tasenselt akked temsefledt n uzmul.

• unmik, d tuggna-s tanektant.

Azmul asnilsan ihi, deg tiẓri n Saussure d tayunt taddayt iɣef bnant tutlayin tigamanin.

Tasnawalt, akken i d-nebder yakan deg tazwara, telha-d d uzraw n umawal. Awal, yezmer ad yettwazrew ɣef sin yiswiren (talɣa d unamek) maca, tuget n yimesnawalen/isnawalen rrnan-d aswir-nniḍen i icudden ɣer tseddast, dayen umi neqqar asedger4 Aswir-a yerza attal n useqdec n wawal, imi awal yezmer ad ibeddel anamek deg wattal ɣer wayeḍ mebla ma ybeddel talɣa. Deg tmuɣli-a, asedger yezmer daɣen ad yettwaqqen ɣer uzraw n wawal deg uswir n unamek.

1.Tasnalɣa

Tasnalɣa d aswir asnilsan i d-yelhan d uzraw n talɣiwin i izmer ad yesɛu wawal, tzerrew taɣessa n daxel n wawal akked usileɣ-is (asuddes, asuddem) ayen umi neqqar tasnalɣa tamawalant.

Tasnalɣa tamawalant d timsemmedt n tesnalɣa timleɣwit i d-yelhan d wezraw n tsenfal n wawalen (taseftit, tannuft) ilmend n taggayin tijeṛṛumin ideg kkint (timeẓri, tawsit, amḍan, addad atg).

1.1. Awal

Deg usegzawal n tesnilest, J. Dubois (2007 : 327) yesbadud awal am « Uferdis asnilsan yesɛan anamek yebnan ɣef yiwen neɣ aṭas n yimeslicen »5 Tabadut-a tegla-d s waṭas n usenqeḍ ɣer yisnilsanen gar-asen A. Martinet (1970 : 16) yettwalin dakken awal d tayunt ur nefṛiz ara, yura-d « deg tefranṣist, yuɛer daɣen akken ad nakez deg yisaka akk ma rzan yiwen, sin neɣ kraḍ n wawalen »6

Tumant-a tettban-d ugar deg wawalen uddisen, deg uswir n unamek mmalen yiwet n tilawt ma deg uswir aseddasan bnan ɣef ugar n tayunt, d amedya, afus n tqabact. Deg taɣult n tesnisemt, tumant-a terna asurif, aynawalen n yismawen uddisen zemren ad awḍen ɣer semmus neɣ ugar, asakan n Lemqam n Sidi Ḥmed Bennuṛ, Taḥemmalt n At Ɛli Webrahem… Ayen yeǧǧan isnilsanen smenyifen ad smersen imekta-nniḍen ara yesɛun talɣa taddayt deg umkan n wawal gar-asen aynawal, aẓar, afeggag…

Awal akken yebɣu yili, d aḥerfi, d uddis, d asuddim…, yesɛa taɣessa taddayt iɣef yebna. Taɣessa-a tettbeddil talɣa yal mi ara s-nernu kra n uferdis ajerruman (tawsit, addad, amḍan, imataren…) ayen umi neqqar deg tesnawalt taɣessa n daxel n wawal. Iferdisen-a ttemgiriden seg tutlayt ɣer tayeḍ, deg tmaziɣt ad d-nemlil.

• Tileɣwit: Ɣer J. DUBOIS (2007: 204),

« Tileɣwit, d ttawil asnalɣan yerzan timerna i yiẓuran (inemyagen, inismanen, atg) iwṣilen neɣ tihrayin ; wigi, mmalen-d tiwuriwin tiseddasin, taggayin tijeṛṛumin n umḍan, n tewsit n wudem […]. Tileɣwit, tekki deg-s tannuft (tileɣwit tanisemt) akked tseftit (tileɣwit tanemyagt) »7

• Iwṣilen: Iwṣilen, rzan azwir akked udfir, ma d ticraḍt n usuddem, d alɣacen nrennu-ten ɣer tazwara d taggara n ufeggag akken ad nbeddel anamek akked tawuri n ufeggag-nni amedya:

« amakur »am- (azwir) akked akur seg umyag aker (afeggag / adda n tisuddma)
« alwayan »alway (afeggag) akked -an (adfir)

• Tihrayin: Tihrayin rzant ticraḍt n umḍan, ticraḍt n tewsit, addad akked tseftit (timeẓri d yimataren udmawanen). Ticraḍt-a nrennu-tent akken ad nbeddel addad n wawal war ma negla-d s ubeddel n ufeggag amedya:

Tawsit (ML / NT) « axxam / taxxamt » t-t d ticraḍ n wunti
Amḍan (SF / SG) « axxam / ixxamen » nd ticreḍ n usget
Addad (IL / MR) « Iṭij / yiṭij » yd ticreḍt n turza (tuqna)

• Timeẓri d yimataren udmawanen : Timeẓri d yimataren udmawanen rrzan taggayt n yimyagen, ttbeyyinen-d ibeddilen i d-yettilin deg umyag yal mi ara ybeddel win i ixeddmen tigawt-nni akked wakud ideg temmug.

Amedya :
uriɣ …… ɣ
turiḍ t …… ḍ
yettaru y……
Ad arun…… n

1.2. Aynawal

Aynawal, d tinekti i d-nettemlil s umata deg taɣult n tesnawalt akked tseknawalt, d tayunt tamawalant taddayt akken i tt-id-yesbadu J. Dubois (2007 : 275) « Aynawal d tayunt taddayt n umawal, deg tenmegla, amawal/ anmeslay, anda amawal yella deg wassaɣ akked tutlayt, anmeslay akked usiwel. Ilmend n teẓriyin, aynawal ad yili yettwaḥseb am walɣac ( = alɣac amawalan) neɣ am tayunt talnamekt »8

Gar umeskar d wayeḍ, gar usegzawal d wayeḍ tettili temgarda deg wayen yerzan tinekti n uynawal. A. Martinet (1967 : 113) yesmenyef deg wadeg n uynawal asemres n tnekti awalec deg tbadut i d-yefka i ttawil n usileɣ yebnan ɣef usuddes, ɣur-s, asuddes yettili s usdukel gar yiwalacen.

Ɣas akken mgaraden yimeskaren-a deg ufran n yisem n tnekti-a maca deg uswir n unamek d yiwet, tettwasemras d tayunt taddayt yesɛan anamek. Ɣer G. Mounin (2004 : 201) « Aynawal, d tayunt n ugsusru tis snat, ihi yesɛan alnamek, ur nezmir ahat ad tbeṭṭu ɣef tayunin timeẓẓyanin »9

1.3. Aẓar

Tanakti n uẓar ur telli deg yimahilen isnawalen d yiseknawalen yemmugen ɣef tutlayt n tmaziɣt. Akken i d-yebder S. Chaker (2017 : 01) « Leqdicat imezwura ɣef tmaziɣt, s unamek usdid ɣef umawal, ur ɛlimen ara s tnakti n uẓar (Cf. Bounfour/Chaker/Lanfry 1995). Armi d taggara n lqern wis XIX, akk isegzawalen d tmawalin, seg win n Venture de Paradis (i d-yeffɣen 1838, maca yemmugen uqbel 1789), ad nɛeddi ɣef usegzawal n teqbaylit 1844, wid n Crusat (1873), Olivier (1878), Huyghe (1896/1901) neɣ leqdic yemmugen ɣef Yitergiyen sɣur Cid Kaoui (1894), asismel-nsen akk yebna ɣef ugemmay, ur d-giren maṭi tanakti n uẓar, ula am yisali ajenṭaḍt »10

Tanakti n uẓar tekcem-d taɣult n tmaziɣt (tasnawalt d tseknawalt) s lmendad n René Basset d André Basset. Maca ar ass-a mazal llan aṭas n wuguren i icudden ɣer tnakti-a. Deg wayen yerzan tirgalin tifeggagin iɣef tebna ; ugten yisaka anda ur nezmir ɣas ini-d d awezɣi ad naweḍ ɣer tergalin tinaṣliyin iɣef bnan kra n wawalen, d amedya gar “ker” KR akked “nker” NKR. Mebla ma nettu daɣen uguren i icudden ɣer wawalen uddisen, amek ara d-yettwakkes uẓar-nsen, amek ara d-ttwasisemlen deg yisegzawalen yebnan ɣef uẓar… ?

Aẓar deg tmaziɣt ires ɣef tegruma tanmeskilt n tergalin umi neqqar tirgalin tifeggagin akked tezgenargalin (tizgenargalin/ tizgenaɣriyin) w, y yesɛan azal n tergalin. Deg tilawt yezmer ad yesɛu anagar yiwet n tergalt asaka n umyag aru seg uẓar R akken i izmer ad yaweḍ ar ukuẓ tikwal ar semmus n tergalin. Iẓuran i iǧehden s tuget d iẓuran bu kraḍ n tergalin M. Taifi (1990).

Kra n yimeskaren ttwalin dakken d iẓuran bu snat n tergalin i ugten, maca ilmend n R. Kahlouche (1992 : 369), iẓuran bu kraḍ n tergalin d timerna i asent-terna tergalt (alɣac) n tisuddma deg kra n tallit deg umezruy. Deg tallit tamirant ur nezmir ad t-id-nessukes ɣef tergalin tifeggagin, asaka n walɣac m ara d –nemlil d amedya, deg yisem umeskar « amakur », « amuḍin « i d-yekkan seg « aker » KR, « aḍen » ḌN.

Aẓar d aferdis anadday ur nqebbel asemẓi d beṭṭu, yecrek akk awalen i ittekkin daxel n yiwet n twacult tamawalant neɣ tasnalɣamkant. Deg tutlayt n tmaziɣt, aẓar yuddes anagar s tergalin (iɣes argalan fell-as i ires unamek amatu n wawal i d-yefrurin deg-s).

Tarrayt n usuffeɣ n uẓar deg wawal ires ɣef tukksa n yiferdisen yecban (tiɣra, ticrad n tisuddma, ticraḍt n tewsit, amḍan, atg) i tayunt, d amedya, tira d awal yebnan ɣef uẓar R.

Deg umawal n tmaziɣt nezmer ad d-nessemgired snat n tsekkiwin n uẓar, ila aẓar amawalan, d aẓar i d-yettaken anagar yiwet n twacult tamawalant. Amedya :

« Kms » kmes, kmumes, sekmes, sekmumes, akmas.
« Drɣl » derɣel, aderɣal, tiderɣelt.
Akked waẓar argalan i izemren ad d-yefk aṭas n twaculin timawalin, amedya
« Dr » idir, tiderrit, dari…

Akken nettwali deg umedya-a, yiwen n uẓar yefka-d aṭas n wawalen, yal yiwen s unamek-is, s twacult-is tamawalant. Amḍan n tergalin yettemgirid gar uẓar amawalan d urgalan ; aẓar amawalan yettili gar kraḍ d asawen n tergalin, simmal amḍan n tergalin yuget, simmal ttilint drus n twaculin timawalanin. Ma d aẓar argalan yesɛa drus n tergalin, gar yiwet ar snat kan.

1.4. Alɣac

Akken aẓar ad yesɛu tilin, ad yuɣal d awal yessefk ad as-nernu kra n yisekkilen (tiɣra neɣ tiɣra d tergalin), isekkilen-a deg tmuɣli tasnilsant qqaren-asen alɣacen. Ɣer M. Taifi (1990 : 92) « Alɣac yesɛa azal ajeṛṛuman, yettbeyyin-d ɣer wacu taggayt taseddasant iɣer yekki wawal i d-yettwasulɣen »11

Seg uẓar R s tmerna n teɣra a……u ad d-nessaleɣ amyag deg talɣa taḥerfit aru, amyag aru yezmer ad yili d adda n tisuddma n waṭas n taggayin timawalin s tmerna n walɣacen n tisuddma, yura d amyag deg talɣa n yizri udem wis kraḍ amalay asuf, imru d isem n wallal, amaru d isem umeskar. Deg tmuɣli tajeṛṛumant, alɣacen-a d ummuɣ yemmden yekkin deg tjeṛṛumt.

2. Asileɣ n umawal n tmaziɣt (taqbaylit)

Asileɣ n umawal deg taɣult n tmaziɣt ires ɣef sin n ttawilat igejdanen (asuddem d usuddes). Asuddem (ajeṛṛuman akked unfalan) d ttawil yeṭṭfen amur ameqqran deg ukala-a n usileɣ n umawal. Ma d asuddes yettwaḥseb ɣer tuget n yimesnilsen ur yugit ara deg ufares n umawal, gar-asen S. Chaker (1991 : 179) akken i d-yebder « Asuddes deg tmaziɣt d tumant i d-yettilin d timexṭa kan, afares-is ur yugit ara, ma d asuddem, ama d anemyag neɣ d anisem, d anagraw agejdan deg tdamsa tamatut n tutlayt »12

Maca deg tilawt, ma nmuqel ɣer yimawalen n waṭas n taɣulin gar-asen amawal n yimɣan, amawal asmidgan, amawal n yismidden… ad nwali dakken tuget n wawalen bnan ɣef ttawil n usuddes. Ilmend n wammud-nneɣ deg tezrawt n dukṭura i nga deg taɣult n tesnisemt (tasmidegt) d amedya, ugar n 60 % dismidgen uddisen, ɣef waya, afares yersen ɣef usuddes yeṭṭef adeg s wazal-is deg umawal n tutlayt.

Ɣer sin-a n ttawilat isnalɣanen, nezmer ad d-nernu sin n ttawilat-nniḍen yesɛan tawuri d tameqqṛant deg ufaṛes n umawal ladɣa deg talliyin tizgerkudin.

Amezwaru d win i d-yebder Haddadou, yerza ireṭṭalen. Haddadou, seg useggas 1985 yakan ijbed-d lwelha-s ttawil-a, ɣur-s yezmer ad yili d yiwen n ubrid n usileɣ n umawal. Aṭas n talɣiwin i d-yekkan seg tutlayin tiberraniyin ttumewlent deg tutlayt n tmaziɣt (taqbaylit), ass-a, ur nezmir ad tent-nessismel gar ireṭṭalen imi uɣent adeg deg tutlayt.

Ma nmuqel ɣer yigemmaḍ i d-yebder (S. Chaker, 2004) deg umagrad-is « Le berbère de Kabylie (Algérie) » gar n 35 ar 40 % deg umawal n teqbaylit yebna ɣef yirṭṭalen ladɣa seg taɛrabt (ama d taɣerfant neɣ d taklasikit).

Ttawil wis sin d tinfaliyin tukrifin i d-yebder Tidjet Mustapha, deg tezrawt n nnig turagt i ixdem deg useggas n 1998, ameskar-a iga aḥric i weslaḍt n tenfaliyin tukrifin, anda i d-ibeyyen dakken tineggura-a ula d nutenti uklalent ad ilint d ttawil n usileɣ.

Areṭṭal n wawalen seg tutlayt ɣer tayeḍ, d tumant yellan d tagamant, ulac tutlayt ur nesɛi ireṭṭalen deg umawal-is. Akken i ttinigen yemdanen seg tmurt ɣer tayeḍ ula d awalen ttinigen seg tutlayt ɣer tayeḍ, maca akken i d-yebder A. Berkai (2009 : 97) ma imdanen ttinigen seg tmura tizawaliyin ɣer tmura timerkantiyin, awalen ttinigen seg tutlayin i iǧehden ɣer tid i iḍeɛfen.

Akeččum n wawalen iberraniyen ɣer tantaliwin n tutlayt n tamaziɣt ur yeɛdil ara, llant tid i iḥuza s lǧehd, asaka n teqbaylit, tacawit, tamzabit… akken llant tid i iḥuza acemma kan asaka n tantaliwin n unẓul n tmurt (tatergit d amedya anagar n 5 %,) (S. Chaker , 1996).

Ma d tinfaliyin tukrifin, ula d nutenti d tilawt yeṭṭfen amkan deg umawal. Asileɣ-nsent yella-d deg talliyin tizgerkudin. Deg yimahilen n tesnilest i d-yellan deg taɣult n tmaziɣt, tinfaliyin tukrifin ttwabdarent-d kan aka d timexṭa deg leqdicat-nsen. Tinfaliyin tukrifin s umata d talɣiwin tuddisin yesɛan tulmisin d tiḥerfiyin ladɣa deg twuri-nsent, amedya,

« Yečča aqerruy-is », « Yečča times », « Yefka awal », « Yeffeɣ i leɛqel-is »

2.1. Asuddes

Asuddes d ttawil asnalɣan n usnulfu n wawalen imaynuten seg wawalen yellan yakan. Asuddes ires ɣef usdukel n uynawalen ( sin naɣ ugar) yesɛan anamek, akken-nniḍen, aynawalen-a zemren ad ttwasqedcen s talɣa tasimant (d ilelliyen), yal yiwen iman-is J. Moeschler & A. Auchlin (2006 : 57), awal i d-yennulfan neqqar-as awal uddis.

Talɣiwin iɣef bnan wawalen uddisen s umata d ti :

• Isem₁ + Isem_2, « Aɣesmar » « iɣes » + « amar » (tamart), « Iɣesdis » « iɣes « + « idis »

• Isem₁ + (n) + Isem_2, « Afus n tqabact », « Ilmendi »s « ilem » + « n » + « dis » seg « idis »

• Isem + Amyag

• Ifireɛqes “d yiwen n ṣṣenf n yiɣersiwen yekkin deg taggayt n yizerman d tɣiredmiwin, deg temnaḍin n tsastant-nneɣ yella s talɣa n wunti « tifireɛqest »

• Amyag + Isem, « Amagraman » d yiwen n senf n yemɣi, imeqqi-d s umata anida llan waman « mager » + « aman »

• Amyag + Amyag, « Creqreq » « creq » + « reɣ », d asmideg deg temnaḍt n umalu

• Aferdis n tjerrumt + Isem

• « Tagersift » d adeg i d-yezgan deg taddart n Lqelɛa deg tɣiwant n Tmezrit, d awal uddis yersen ɣef « ger » + « asif »

Talɣiwin-a ur rzint ara kan kra n taɣult iman-is, d talɣiwin i nezmer ad d-nemlil akk deg taɣulin yellan deg tutlayt, tasertit, taṣreḍt, tadamsa, tafellaḥt, imɣan, timarawt, awalen atraren (deg taɣult n tussna)13, tiɣawsiwin, tuddsa tanmettit…, maca s yeiswiren yemgaraden.

Amedya gar talɣiwin yugten d tid yebnan ɣef talɣa isem₁ + n + isem₂.

Abrid n tmacint, mmi-s n gma, lǧameɛ n tẓalit, lḥenni n temcict, tamacint n tarda…

Deg taɣult n tesmidegt, ad d-nemlil ismidgen uddisen yeffɣen berra n talɣiwin-a. D taggayt umi nsemma deg umahil-a ismidgen iɣezfanen, talɣa-nsen tezmer ad taweḍ ɣer 4, 5, 6… n tayunin.

Amedya, « Lemqam n Sidi Ḥmed Bennuṛ », « Lemqam n Sidi Lḥaǧ Weɛwica », « Tadekkart n At Ɛli Webrahem »

Asileɣ deg taɣult n tesmidegt am tesmiddent daɣen ur yebni ara ɣef kra n yilugan, d asileɣ i d-yettilin aka kan. Talɣiwin ttiɣzifent yal mi ara d yettwaḥettem ɣef yimsiwal ad semgirden amkan ɣef wayeḍ neɣ amdan ɣef wayeḍ.

2.2. Asuddem

S umata, asuddem yerza asnulfu n wawalen imaynuten (tayunin timawalin) seg wawalen yellan yakan deg tutlayt. D ttawil yersen ɣef temgarda n walɣacen imleɣwiyen. Ttawil-a yerza asileɣ n wawal amaynut s tmerna n uferdis n tjeṛṛumt i wawal yesɛan tilin yakan (adda). Deg taɣult n tmaziɣt nezmer ad d-nessemgired deg ukata-a n usuddem : (asuddem ajeṛṛuman akked usuddem anfalan).

2.2.1. Asuddem ajeṛṛuman

Asuddem ajeṛṛuman yerza timerna n yiferdisen n tjeṛṛumt i wadda anemyag neɣ anisem.

2.2.1.1. Asuddem anemyag ɣef wadda anemyag

Seg wadda anemyag nezmer ad d-nessileɣ isuddimen inemyagen s tmerna n uttwaɣ, aswaɣ akked umyaɣ. Timerna n walɣacen-a n tisuddma ur tris ara deg tilawt ɣef kra n yilugan iseddasen neɣ ijerrumen i d-yettbeyyinen anwa alɣac ara d-yernun ɣer wadda n tisuddma amedya, alɣacen (s, ss)deg usaka n uswaɣ nezmer ad t-nernu i wadda « lmed » « sselmed », « ddu » « sseddu », ur nezmir ad t-nernu i wadda « af », « nad"i », « ẓer »…

Alɣacen (ttwa, ttu, ttw)n umyaɣ nezmer ad t-nernu i wadda « qqes », « ttwaqqes », « rnn », « ttwarnu », ur nezmir ad t-nernu i wadda « lmed », « af », « ẓer »…

Alɣacen n umyaɣ(my, mm) nezmer ad t-nernu i wadda « af », « myaf », maca ur nezmir ad t-nernu i wadda « lmed »…

Maca, yezmer wadda n tisuddma ad yeqbel sin n walɣacen ayen umi neqqar alɣacen isemlalen.

Aswaɣ, yettili usileɣ-is s tmerna n yiwen seg walɣacen-a (s, ss, sse, ssu) i wadda anemyag amedya, azwir s- ad tnernu i wadda « Bedd » ad d-yefk « sbed », « Nnerni » « snern »i, « Ečč » « sečč « 

Azwir sse- ad t-nernu iwadda « Rwel »ad d-yefk « sserwel », « Ddu » « sseddu », « Ers » « ssers ». Azwir ssu ad t-nernu i wadda « Ffeɣ » ad d-yefk « ssuffeɣ »

Deg kra n yisaka, timerna n uzwir ussid ss- igellu-d s temlellit deg wadda n tisuddma , amedya

« Afeg » « ssifeg » temlellit ɣer tazwara a ………….i
« Imlul » « ssimle »l temlellit ɣer taggara u………....e
« Irqiq » « ssirqeq » timlellit ɣer taggara i………….e

Deg wayen yerzan attwaɣ, s umata yettili-d usuddem-is srid seg umyag amsuk s tmerna n uzwir (ttu, ttw, ttwa, mm/nn) i wadda anemyag amedya, azwir ttu- ad t-nernu i wadda « Beddel » ad d-yefk « ttubeddel », « Dawi » « ttudawi ». Azwir ttw/ttwa- ad t-nernu iwadda « Azen » ad d-yefk « ttwazen », « Ddem » « ttwaddem ». Azwir mm/nn- ad t-nernu i wadda « Els » ad d-yefk « mmels », « Zlu » « mmzel », « Ečč » « mmečč », « Bru » « nnebru »

Amyaɣ, yettili usileɣ-is s tmerna n (my, mye, myu, m) i wadda anemyag amedya, azwir my-ma nerna-t i wadda « If » ad d-yefk « myif », « Asem » « myasem », « Err » « myer ». Azwir mye-« Kcem » « myekcam », azwir myu- « Zzem » « myuzzam », « Issin » « myussan ». Azwir m- « Nadi » « mnadi », « Gaber » « mgabar ».

Ɣer taggara n ukala-a ad d-nernu asuddim asemlal, d asuddim yebna ɣef tmerna n sin walɣacen i wadda anemyag. Win yugten, d asemlal ms-, yezmer ad yuddes d umyaɣ akked uswaɣ amsuk, amedya : « azel » « sazel » « msazel », « ečč » « sečč » « msečč »

2.2.1.2. Asuddem anemyag ɣef wadda anisem

D ttawil n usileɣ yersen ɣef tmerna n walɣac anemyag (s, m/sm-)14 i talɣiwin tinismawin yemgaraden. Tawuri n walɣacen-a, ttaran taggayin tinismawin ɣer taggayin tinemyagin amedya, « Amsed » « semsed », « awal » « siwe », « amaɣbun » « smuɣben » , « amahbul » « muhbel/smuhbel »

Isem asuddim yezmer ad d-yili seg wadda anisem yakan am wakken i izmer ad d-yettwasuddem seg wadda anemyag. Tuget n leqdicat yellan ɣef usileɣ n umawal deg taɣult n tmaziɣt fkan azal ugar i usileɣ n yismawen seg wadda anemyag. D tidet, d ttawil-a (asuddem seg wadda anemyag) i ugten, maca ula d win yebnan ɣef wadda anisem yesɛa amkan-is deg ukala-a n usileɣ n umawal.

Seg wadda anemyag nezmer ad d-nessuddem isem n tigawt, isem umeskar, isem n wallal, Arbib, ihi seg yiwen n wadda nezmer ad d-nessuddem ugar n talɣa (Tidjet M, 2013). Isem n tigawt yemmal ayen i d-iḍerrun, tulmisin-is tigejdanin d ti :

Tafelwit 01 : isem n tigawt 

Ticreḍt tigejdanin	Askkim	Adda n tisuddma	Isem asuddim
Tawsit Amalay – asuf	a…………… a……………ia………………u i………………..i u………………..i u……………….u Ø	Mured,Ali, Zwi Semlil, ɣil budd bedd, qqim ečč zzu urar, ffad	Amured ,Alluy,Azway Asemlili, Aɣili Abuddu Ibeddi, Iɣimi Učči Uzzu Urar, fad
Amalay – asget	i……………..an	Err-d	Iriran
Asuf - unti	Ta…… a Ta…… .i Ta…… it Te…… . Ti…… i Tu…… a	Irid Del, Ssusem, Gen Dari Iwzil , Iwriɣ Zleg , Zegzew Aker	Tarda Taduli, Tasusmi, Taguni tadarit Tewzel, Tewreɣ Tizelgi, Tizegzewt Tukerḍa
Unti – asget	Ti…… Tu…… in	Rzef Uɣal	Tirezzaf Tuɣalin

Tuget seg yismawen n tigawt deg tilawt d ismawen umyigen ikmamen daɣen, asaka n yisem tira yemmal tira isem n tigawt, yemmal tira-nni s timmad-is. Učči, yemmal isem n tigawt, terza tigawt n wučči, yerza učči lmakla-nni s timmad-is.

Isem n umeskar yemmal win i ixeddmen tigawt, ilmend n (Nait Zerrad K, 1995b), asileɣ n yisem n umeskar yettili-d s tmerna n uzwir am- neɣ d timexṭa s tsenfelt-is an- mi ara yili deg ufeggag n umyag-nni n tisuddma yiwet seg tencucin (labiales) m,b,t,w.(wali tafelwit i d-iteddun).

Tafelwit 02 : isem n umeskar

Askkim	Adda n tisuddma	Isem asuddim/isem umeskar
Ame…… Am…… u Am…… a Im…… . Ane…… aReRRaR amuRiR	Krez, Zwi ẓẓall, eks inig lmed sselmed, smed aḍen	Amekraz, Amezway (yezmer ad yili daɣen d isem n wallal) Amẓallu Ameksa Iminig Anelmad Aselmad, asemmad Amuḍin

Llan yismawen imeskaren ur nesɛi adda n tisuddma deg tmaziɣt, s umata d ismawen i d-ikecmen deg tutlayin tiberraniyin ladɣa deg tefṛansist akked taɛrbt gar-asen ad nebder wi: abulisi, aǧaḍarmi, apumpyi, lqayed, aɛṣekṛi…

Isem n wallal yemmal-d taɣawsa s wayes teḍra tigawt, yettaleɣ deg tuget n yisaka s tmerna n walɣac s- i wadda anemyag. Ttawil-a ur yugit ara ma nesserwes-it ɣer ttawilat-nniḍen am yisem n tigawt, isem umeskar ladɣa deg tantala n teqbaylit, azwir s- « Agem », « asagem », « Gnu », « isegni », « tisegnit, », « Qqes », « tisiqqest ». Azwir am/im- « Zwi », « amezway », « Ddez », « amaddaz ». Yezmer daɣen akken i d-nebder deg yimedyaten yezrin dakken awalen « amezway », « amadaz », zemren ad d-mmalen daɣen isem umeskar.

Ma d ayen yerzan arbib, deg leqdicat i d-yellan tazwara ɣef tesnilest tamaziɣt Basset (1952, 1957), (Galand, 1960), (Bentolila, 1981) ur fkin ara azal i taggayt-a tamawalant, ttwalin ulac kra n temgarda gar n urbib akked yisem amilan. Arbib deg-s akk ticraḍt yellan deg yisem amilan, yezmer ahat d ayen yeǧǧan isnilsanen-a sasemlen-t deg yiwet n taggayt.

Amezwaru i d-yerran lwelha-s ɣer taggayt-a d (Penchoen, 1973/a – b) ɣef tmeslayt n waṭlas alemmas akked (S. Chaker, 1983) ɣef tmeslayt n teqbaylit. Ɣer yineggura-a tamgerda yellan gar urbib d yisem amilan tres ɣef twuri n zyada yesɛa urbib, d tawuri ur nelli deg yisem amilan. Deg uswir aseddasan, arbib yezmer ad yeḍfer isem war ma tekki gar-asen tenzeɣt yerna ad yili deg waddad ilelli, isem amilan → arbib (deg waddad ilelli) amedya, « argaz ameqqran », « aqcic ameẓẓyan », « afus aberkan ».

Tulmist-a terza kan arbib, ma d isem amilan ur yezmir ad yesseḍfer isem-nniḍen war ma tekka gar-asen tenzeɣt, amedya: afus (n) « taqabact »/ tqabact, axxam (n) « argaz » / w/urgaz

S wudem amatu, asileɣ n urbib ibedd ɣef umyag n tɣara. S umata, ilmend n K. Nait Zerrad (1995b), arbib yettaleɣ s tmerna n uzwr « am » i umyag neɣ ḥedd deg tsenfal-is neɣ s tmerna n udfir « an », « imɣur » « ameqqṛan », « izdig », « azedgan ».

2.2.2. Asuddem n yisem seg wadda anisem

Deg yiseggasen-a ineggura leqdicat yemmugen ɣef tesnawalt n tutlayt n tmaziɣt (taqbaylit) ladɣa deg wayen yerzan asileɣ n umawal ayen umi neqqar (la synthématique berbère), ḥuzan aṭas n temsal yellan deg talliyin yezrin, ur asent-yettunefk ara wazal (Tidjet M, 2013).

Asileɣ n yismawen seg wadda anisem yerza s tuget ismawen n yimezdaɣ, seg wadeg n tmezduɣt (tamurt, lɛerc, aɣir, taddart) nezmer ad d-nessudem isem n umezdaɣ/tamezdaɣt akked tutlayt n temnaḍt-nni. D amedya : « Lezzayer », « azzayri », « tazzayrit (tamezdaɣt) » « tazzayrit (tameslayt), « At Ɛidel », « aɛidli », « taɛidlit (tamezdaɣt) », « taɛidlit (tameslayt) »

2.3. Asileɣ anfalan

Talɣiwin tinfaliyin d tumant taqburt deg tutlayt n tmaziɣt, d asmil yuget deg tutlayt, d tasekka yeṭṭfen adeg s wazal-is deg ufares n umawal. Ɣas akken deg tezrawin tismazaɣin taggayt-a tuqa, akken i d-yebder (NaÏt-Zerrad K, 2003 : 28) “Ttawil-nniḍen n usileɣ n umawal yeqqimen ur yettwassen ara d asuddem anfalan, yezmer ahat, ilmend n luɛara yellan deg usuffeɣ n walɣacen yesɛan kra n unamek ibanen”15 .

Deg tmuɣli tadkudant, asmil-a n umawal mazal-it yedder. Maca, ilmend n ugama n usileɣ-is i d-yellan deg talliyin tizgerkudin si tama, akked ttawilat iɣef ires usileɣ-is si tama-nniḍen (timerna n walɣacen infaliyen) ur as-yettunefk ara wazal.

Deg tallit tamirant (tadkudant), alɣacen-a sruḥen azal asnamkan-nsen deg tutlayt, dayen yeǧǧan azraw-nsen deg waṭas n yisaka d awezɣi (Haddadou, 2011). D tikti daɣen iɣef d-yemmeslay (Kahlouche R, 1996) deg umagrad-is tasnilest d tesnalest anda i d-yemmeslay ɣef walɣacen infaliyen, yettwali dakken yewɛer ad d-yini ḥedd deg tallit tadkudant ma yella kkin walɣacen-a deg uẓar n wawal, neɣ ttwarnan kan deg yiswi anfalan imi yewɛer urmaq-nsen.

Deg tmuɣli tadkudant, asemgired n talɣiwin tinfalanin deg umawal umris d ayen yuɛren, anagar akken i d-yebder (Tidjet M, 2013 :59) ma nga aserwes gar tantaliwin d tmeslayin s wyes ara nessiweḍ ad d-nin ma d talɣiwin tinfaliyin naɣ ala. Asaka n walɣacen q- d c- deg uqemmuc (imi), ɛ- deg aɛrur, arur deg tcelḥit.

Ilmend n M. Grammont akken i d-yettwabder sɣur (Haddadou M – A, 1985 :146) asileɣ anfalan yebḍa ɣef snat n tsekkiwin :

Tasekka tamezwarut terza tamawalt (asnirem) d tulsaslant yersen ɣef uɛiwed n ufares amsislan n lḥes (lḥes n tɣawsiwin, ṣṣut n yimdanen, ṣṣut d usuɣu n yiɣerṣiwen…), amedya,

« Beɛbeɛ », seg « beɛ + beɛ » « asbeɛbeɛ », « Beḥbeḥ », seg « beḥ + beḥ » asbeḥbeḥ », « Degdeg » seg « deg + deg » « adegdeg, asdegdeg », « Ṭebṭeb » seg « ṭeb + ṭeb » « aṭebṭeb, asṭebṭeb »

Tasekka tis snat d asileɣ yebnan ɣef usuddem ayen umi neqqar asuddem anfalan, ttawil-a iḥuza aṭas n yinurar deg umawal n tmaziɣt.. Ticraḍt n tisuddma iɣef yres usmil-a ssawḍent ad snernint ummuɣ n tayunin yellan deg tutlayt, rnu ssishilent akeččum-nsent ɣur-s (ɣer tutlayt) (Chaker S, 1981).

Alɣacen infalanen ttakken tanila (orientation) tanfalant i unamek amezwaru n uynawal adday, tin ɣur-s, asuddim anfalan iseɛɛu dima azal asnamkan i irennu i wadda n tisuddma (Tidjet M,2013).

Ilmend n (Haddadou M – A, 1985), tuget n yisuddimen n usmil-a ttumewlen, acku si tama, timerna n walɣacen isuddimen i wadda n tisuddma ur ttbeddilen ara talɣa taddayt n tayunin-a, si tama-nniḍen, deg tmuɣli tadkudant tayunin-a tisuddimin ur sɛint ara tillin tasimant.

Asuddem anfalan ires ɣef tmerna n walɣacen infaliyen i wadda n tisuddma (adda anemyag neɣ anisem). Deg ttawil-a ad nessemgired asuddem s uslag (dérivation par redoublement) akked usuddem s usewṣel.

Asuddem s uslag akken i d-yebder (Berkai A, 2009: 45) « Aslag yezmer ad iḥaz adda d akemmali neɣ yiwet n tergalt kan i d-igellun dima s uɣelluy n teɣri »16 Aslag n wadda n tisuddma asaka n wadda anemyag, deg teqbaylit yerza anagar ifeggagen bu snat n tergalin, amedya, « Denden » seg « den », « Deqdeq » seg « deq », « Kefkef » seg « kef »

Deg tantala tatergit, aslag yezmer ad iḥaz ula d ifeggagen bu kraḍ n tergalin asaka n klefklef < seg klef (s’embrouiller dans ses paroles), ḍerranḍerran< seg ḍerran/ ḍren (fait de tourner sans cesse, ḍren< tourner, changer de direction (F. I: 285) yettwabedred daɣen sɣur (Berkai A, 2009: 45) .

Ma d addayen inismawen ad d-nemlil ismawen n timarawt aska n baba, nanna, dadda, asemẓi deg kra n yismidden qiqi, ṭaṭa, ǧaǧa…, neɣ deg yimɣan ilili, aɣiɣa… (Tidjet M, 2013).

Deg usuddem s usewṣel, alɣacen iɣef yres ttawil-a n usileɣ zemren ad ttwasuddsen gar-asen, d ayen yeǧǧan armaq-nsen ur yelli d ayen isehlen. Iwṣilen-a llan gar-asen wid yesɛan azal n ucemmet; aɣenǧur, axenfur. Llan wid yesɛan azal n usemẓi wid i d-yettakken ayen umi neqqar imsileqqen (les hypocoristiques) d amedya tafuset (Haddadou M, 2011).

Gar walɣacen infalanen i imucaɛen i d-ikeččmen deg ttawil-a n usileɣ ad d-nebder d amedya17, alɣac ḥ- « ḥnunneḍ », « enneḍ », tuzya, adewweṛ, alɣac q – c- « aqemmuc » « imi », alɣacen-a yezmer mmalen acemmet neɣ asemɣeṛ. Alɣac c/č- « aɛeqquc » « aɛeqqa », d asemẓi akked walɣac ɛ- « aɛebbuḍ » « buḍ » deg tumẓabt, « aɛrur » « arur » deg tantala tatergit (Haddadou M - A, 2011: 94).

2.4. Ireṭṭalen

Seg talliyin timensayin (tiqburin), tamaziɣt tella deg unermis imezgi d tutlayin timeqqranin (tafniqit d yefniqeyen, talaṭinit d yegrigyen akked yirumaniyen, taɛrabt d waɛraben, tafransist d yefransisen). Yal yiwet seg tutlayin-a teǧǧa-d lǧerra-s deg tutlayt tamaziɣt, maca s yeswiren yemgaraden.

Lixsas yellan deg umawal yerzan aṭas n taɣulin ladɣa tid i icudden ɣer tudert n yal ass deg tamaziɣt si tama, d uẓayer-is deg tmetti (tuɣal deg rrif) si tama-nniḍen, fkan afud i yal taɣerma akken ad teẓẓu amawal-is deg-s.

Ireṭṭalen seg tutlayin yellan send akeččum n waɛraben ama d tafiniqit neɣ d talaṭinit d imeṭṭuyac kan i d-yeqqimen ass-a deg tutlayt n tmaziɣt. Wid i mazal dren kra deg-sen ttwaḥerzen s tallelt n tesnisemt ladɣa tasmidegt, kra tɣumiten taɛṛabt deg usaka n tefniqit akked tefranṣist deg usaka n tlaṭinit.

Taɛṛabt d tefranṣist, d tutlayin i iḥuzan aṭas amawal n tmaziɣt deg tmuɣli tadkudant. Taɛrabt tella deg unermis akked tmaziɣt seg tasut tis VII ar ass-a, azal n 15 n leqrun. Rnu ɣur-s, anzi yellan gar-asent (taɛrabt-tamaziɣt) deg yeswiren isnilsanen yemgaraden akken i d-yebder D. Cohen (1968: 1318) « Deg tuddsa n yinagrawen isnalɣanen i yeǧhed yinzi gar tutlayin tiḥemsamin »18 , yerna yessashel-d akeččum n wawalen ireṭṭalen seg taɛṛabt.

Tasut tis XIX, d tasut yellin tawwurt i yinurar ussnanen yemgaraden, ladɣa tatiknulujit i d-yeglan s yimawalen uzzigen. Tasut tis XIX daɣen, d tasut i d-yeɣlin d ukeččum n fṛansa ɣer tmurt n Lezzayer. Akeččum n Franṣa akken i d-yegla s ubeddel deg tɣessa n tmetti (tuddsa tanmettit)19 yegla-d daɣen s ttawilat atraren yellan d imaynuten ɣef tmetti-a.

Ireṭṭalen seg tutlayt tafṛansist ula d nutni ǧehden, maca s umata, rzan kra n taɣulin kan i icuden ɣer tussna, tasertit akked kra n tɣawsiwin.

Deg uswir asnilsan akken i d-yebder ‘Imarazene M, 2007: 31 – 32) deg udlis-is Manuel de syntaxe berbère, llant kraḍ n tsekkiwin n yireṭṭalen, ttwasisemlen ilmend n tfesna n temsertit akked ukeččum-nsen deg unagraw amsislan, asnimeslan akked usnalɣan n tmaziɣt: ireṭṭalen yettumewlen d ikemmaliyen, ireṭṭalen yettumewlen d azgen kan (aḥric deg-sen kan) akked yreṭṭalen ur yettumewlen ara mati amedya, « Lqelɛa » seg « Lqalɛa/Qalɛa », « Meckura » seg « Cakur/ Cakara », « Lexmis » « Lxamis » d ass n umalas, « Tajmaɛt » seg « Ljamaɛa », « Timeqbert » seg « Maqbara », « Alwiḥ » seg « Lawḥ »…

3. Tasnamka

Aswir wis sin iɣef yezmer ad yettwazrew wawal d aswir n unamek, tussna i d-yelhan yid-s d tasnamka tamawalant. Awal tasnamka iban-d ɣer taggara n tasut tis XIX sɣur amesnilsan afṛansawi (Michel Bréal,1832 – 1915). Awal tasnamka, yekka-d seg umyag agrigi sêma, atos yebɣan ad yinin “signifier”, “vouloir dir”, akked sêmeion (azmul) M. Mahrazi (2011: 171).

Tasnamka deg tazwara telha-d d umhaz n unamek n wawalen deg wakud (tasnamka tazgerkudant), sin ɣer-s, tessahrew taɣult-is tuɣal telha-d daɣen d yinumak i izmer ad yesɛu wawal neɣ tafyirt deg tmuɣli tadkudant.

3.1. Tasnamka tamawalant

S tenmegla ɣer tesnalɣa tamawalant i d-yelhan d tuddsa tasnalɣant n wawalen, i izerrew taɣessa n wawalen akked wassaɣen isnalɣanen yellan gar-asen. Tasnamka tamawalant tzerrew tuddsa tasnamkant n wawalen.

Tselleḍt inumak n wawalen akked wasaɣen isnamkanen i izemren ad ilin gar-asen. Tasnamka tamawalant, tessemras imekta i icudden ɣer uzmul amesnilsan amedya: deg uzraw n unagraw asnamkan simal teggar-d ugur n tgetnamekt akked tmegdiwt...

3.1.1. Anamek

Tanakti n unamek tella gar wuguren igejdanen i iceɣben imesnilsen seg zik aya, ayen yeǧǧan flalint-d aṭas n tiẓriyin yekkaten ad sbadunt anamek, ar ass-a mazal ur yesɛi tabadut i irekden.

Akken ad tili tbadut yemmden ɣef demma-s, yessefk deg tazwara imesnilsen i d-yelhan d usentel-a ad tgezmen deg rray ɣef wacu ara tebnu tbadut n unamek. Ma ɣef unamek n wawal-nni am tayunt tamawalant kan, ilmend n wattal i iseɛɛu deg tefyirt, ilmend n wassaɣen i iseɛɛu d umsisɣul…

Ɣer K. Baylon (1995: 36) anamek n wawal ires ɣef sin n yiswiren:

Aswir amezwaru yerza anamek yesɛa deg tutlayt, d anamek yettwassnen ɣer yimsiwal n tutlayt. Wid i tt-yessemrasen sɛan fell-as tamussni terked ayen umi neqqar anamek adday yerna yettwassen akk ɣer yimsiwal.

Aswir wis sin yerza anamek n usemres-is, d udem yettbeddilen ilmend n waṭas n temsal. Ayen yeǧǧan anagraw asnamkan ur yefriẓ ara (ur yerkid ara) yezga yuɛer akken ad ḥudd tilist-is.

Anamek d ayen i icudden ɣer wattal n usemres, ɣer uẓayer n win i d-yettmeslayen, ɣer ugama n usentel iɣef d-yettmeslay, meḥsub icudd ɣer wayen umi neqqar tasnigit.

3.1.2. Attal

Imekti attal deg tazwara yerza aḍris yuran, d anamek amatu i ibɣa ad d-yessegzi neɣ d tikti tamatut i ibɣa ad yessaweḍ walbeɛḍ. Awal deg ugama-s d agetnamkan, yezmer ad yesɛu ugar n unamek, ihi, asemgired gar yinumak-a ur yezmir ad d-yili anagar ma yekcem deg tefyirt, deg uḍris…

Attal yerza anamek, yettaddam wawal ilmend n wayen i as-d-yezzin. Ɣer J. Dubois (2007: 116) “Neqqar attal neɣ attal imawi, anda i d-tezga kra n tayunt deg uḍris akemmali, yaɛni iferdisen yezwaren neɣ i d-yeṭṭafaren tayunt-a, d ayen i as-d-yezzin”20

Ilmend n A-M. Chabrolle-Cerretini (2006: 89) imekti attal yezmer ad yerzu: tilawt tasnilsant, mi ara d-yemmal assaɣen yellan sdaxel n uḍris. Yezmer ad yerzu tilawt ur nelli d tasnilsant (tamefɣilsant) mi ara d-yemmal asdukkel gar afares n tayunt akked twetlin n ufares-is.

Deg tmuɣli taseddasant, attal asnilsan yerza anamek i tettaddam kra n tayunt ilmend n yiferdisen i as-d-yezzin deg tefyirt aamedya, awal afus, deg unamek-is amatu yemmal-d agmam deg tfekka n umdan neɣ n kra n tɣawsa. Maca mi ara d-yekcem deg tefyirt yezmer ad yeddem ugar n unamek. « amdan-a yesɛa afus ɣer ddula », « amdan-a kemmil ufus-is, taɣawsa i teǧǧiḍ sdat-s ur ttettafeḍ ara ».

Deg umedya amezwaru awal afus yemmal-d assaɣen yesɛa umdan-nni ɣer ddula (tamussni), ma deg umedya wis sin, awal afus yemmal-d tukerḍa.

Ma d attal amefɣilsan yerza tagruma n tegnatin ideg d-yella ufares n wawal-nni. Tignatin-a zemrent ad ilint d tinmettiyin, tinmezrayin, d tidelsanin…

3.1.3. Amsisɣul

Tutlayt d tagruma n yizmulen yuddsen akken iwata deg unagarw umi isemma Saussure anagraw asnilsan. Deg tmuɣli-s ayen akk ur nekki deg unagraw-a ur yekki deg tutlayt. Maca tella tilawt yeffɣen berra n unagraw asnilsan ur nezmir ad nerr deg rrif. Akken i d-yebder Jean Dubois (2007 : 405) deg tbadut i d-yefka i umsisɣul « Neqqar amsisɣul, ayen (yedren = l’être) neɣ taɣawsa ɣer wayen yezmer ad yuɣal uzmul asnilsan deg tilawt tamefɣiles »21 Tilawt tamefɣilest terza assaɣ yellan gar uzmul asnilas yebnan ɣef umsil d wunmik akked wayen i d-yemmal deg tilawt. Akken-nniḍen, amsisɣul yezmer ad d-yettwasegzi s wassaɣ yella gar wawal d wayen i d-yemmal. tiɣawsiwin, timiḍranin, tigawin. Ɣer G. Mounin (2004 : 284) deg tbadut i d-yefka i temsisɣelt yenna-d dakken “Tutlayt, s timmad-is d tagruma yuddsen d talɣiwin, ur tesɛi tillin anagar ma tella deg wassaɣ d termit sɛan yemsiwal d umaḍal. S umata, tamsisɣelt d assaɣ-a yellan seg uzmul ɣer tilawt”22

3.2. Assaɣen isnamkanen

Assaɣen isnamkanen, d tisekta tisnamkanin i zemren ad sɛun wawalen. Deg taɣult n tmaziɣt am taɣulin n tutlayin tigamanin-nniḍen, nezmer ad d-nessemgired ukuẓ n tsekta tigejdanin23 :

3.2.1. Tasekta tamenzamekt

Anamek amenzamek n wawal d anamek-is amsisɣul, deg tmuɣli tanmuddist, ulac kra n wassaɣ gar talɣa n wawal d wayen i d-yemmal (arasaɣ). Akken-nniḍen, ayen i d-yemmal deg tilawt (amsisɣul) yezmer ad yeddem ismawen-nniḍen, amedya, « Tawwurt », deg tantala tAqbaylit, « tiflut », deg tantala n lmaruk, « porte » deg tutlayt n tefṛansist, « igenni », « ijenni », ciel, « iger », « aḥriq », « champ ». Awalen-a mmalen-d yiwet n tɣawsa, maca ulac kra n wassaɣ gar talɣa n wawalen-a akked tɣawsa-nni i d-mmalen, d assaɣ yersen ɣef umsasi gar yimsiwal n tutlayt.

Llant kra n tsuraf yerzan assaɣ yellan gar talɣa d unamek n wawal, d tisuraf ara d-nemlil deg umawal ulsaslan. Deg uswir amsislan, awalen-a bnan ɣef lḥes n tɣawsiwin, n yimdanen, asuɣu n yiɣerṣiwen24… « cercer » yebna ɣef umseḍfer n yimesla i d-yemmugen seg ucercer n waman, « gerger » yekka-d seg yimesla i d-yekkan seg taɣect

3.2.2. Tasekta tayḍamekt

Ɣer (Jean Dubois, 2004, 111) « Taydamekt tezmer ad tcudd ɣer termit n temɣiwent tasnilsant akk neɣ ɣer tin n kra n ugraw kan, »25 Tawuri tayḍamekt n yiwet n tilawt tezmer ad temgired deg temɣiwant ɣer tayeḍ. Isnilsanen s umata sbadun-d tayḍamekt s tenmegla ɣer unamek amenzamek n wawal.

Tasekta tayḍamekt n wawal tcudd s waṭas ɣer uẓayer d wattal n usemres n wawal-nni. Tasekta-a tezmer ad tettwasemres ɣef sin n yiswiren, tezmer ad tili d acebaḥ (d azal), akken i tezmer ad tili deg unamek n ucemmet amedya,

« d izem » argaz-a am zun d izem.
« d tasekkurt / d tafruxt » taqcict-a d tasekkurt.
« d azrem » amdan-a d azrem.
« d tagarfa » amzun d tagarfa.

Deg sin n yimedyaten imezwura, tawuri tayḍamekt n wawalen « izem » d « tsekkurt », mmalen-d acebbeḥ, tirugza d tebɣest, ma deg sin n yimedyaten ineggura mmalen acemmet, leqbaḥa, tixidas atg.

3.2.3. Tasekta tanmuddist

Assaɣ anmuddis d assaɣ i icudden ɣer uswir aseddasan, d anamek i d-ittekken seg usdukel n wawalen. Deg tutlayt n tmaziɣt assaɣ-a yuget nezzeh, nezmer ad d-nebder kra n yimedyaten gar-asen :

« Yečča times » yemmal-d lefqaɛat ; asdukel n wawalen-a fkan-d talalit i unamek d amaynut, dayen i icudden ɣer tilawt yellan berra n unamek ajerruman n tefyirt-a.
« Yesres anzel »yeḥbes lxedma, ur ixeddem ara
« Yerẓa-d adrar » yaɛya
« Yesɛa iles » yessen ad yehder

3.2.4. Tasekta tanmudemt

Assaɣen inmudmen, d inemgalen n wassaɣen inmuddisen, d assaɣen yerzan asdukkel n yinumak n wawalen anida, wa yezmer ad yeṭṭef adeg n wayeḍ deg kra n wattal aseddasan. Assaɣen inmudmen deg tutlayt n tmaziɣt ugtent ugar n wassaɣen inmuddisen, nezmer ad ten-d-nesnegrew deg tsekkiwin-a :

3.2.4.1. Tamegdiwt

Tamegdiwt, d assaɣ asnamkan yettilin gar sin neɣ ugar n wawalen i d-yemmalen yiwen n unamek. Neqqar tamegdawt, snat naɣ ugar n talɣiwin yesɛan yiwen n unamek amenzamek ameday, « tawwurt » « tiflut » « lbab », « tagelzimt » « tagesrart », « lmeqli » « bufruḥ » « ṭawa », « tagrurt » « taneqlet »

3.2.4.2. Tameglawalt

Tameglawalt, d imekti i d-yemmalen tanmegla n unamek, akken-nniḍn, neqqar tameglawalt, tayunin yellan anamek d anemgal. Yettili tikwal, mi ara nebɣu ad d-nḥud anamek n wawal nettuɣal ɣer unemgal-is, d ttawil i sseqdacen yemsiwal ladɣa ma ur yelli wawal i d-yemmalen tikti i bɣan ad senfalin amedya, « tama n wadda » « tama ufella », « ddaw n ubrid » « nnig n ubrid », « axxam ufella » « axxam n wadda », « taɛkemt ẓẓayen » « taɛkemt xfifen ».

Da tanmegla tella deg tilawt gar snat n tamiwin, iberdan, ixxamen akked tɛekmin, maca ur nezmir ad d-nessegzi tanmegla yellan gar-asen ɣef waya kecmen-d yinemgalen-a (w)adda <afella, ddaw < nnig, lxeffa < taẓẓeyt. Am waken daɣen i ttilin d tiyigwin kan, sin sin. Amedya, « ameqqran » « ameẓẓyan », « amelḥan » « amessas », « awtem » « tawtemt », « aɣezfan » « awezlan »

Tamawt: Tikwal, tameglawalt tettili d aserwes gar tɣawsiwin, imdanen…

Amedya:

axxam-a meqqer kter wakken yella zik.
tura tḥerceḍ kter wala uqbel.
Inemgalen n wawalen « meqqer », « tḥerceḍ » deg yimedyaten-a d uffiren, ur d-ttwabedren ara s talɣa tusridt, deg umedya amezwaru yettwasegza-d s tenfalit « kter waken yella zik » « meẓẓi », amedya wis sin s tenfalit « kter wala uqbel » « tiɛugent/ teɛɛugneḍ ».

3.2.4.3. Tagetnamekt d teynisemt

Deg tesnamka, tagetnamekt temmal tuget n yinumak, tagetnamekt s umata tettnadi ad d-tefk akk inumak i izmer ad yesɛu wawal d amedya, awal « ixef « yemmal:

« aqerru »
« tagara n kra n tɣawsa » (ixef n wedrar)
« ikerri » yelhan

Ma d taynisemt, d asaka yemgaraden, ɣer J. Peytard & E. Genouvrier (1970: 270) aynismanen, d awalen yesɛan yiwet n talɣa tamsislant yemgaraden deg unamek. Ma ɣer G. Mounin (2004: 164), « Taynisemt, d assaɣ yellan gar snat (neɣ ugar) n talɣiwin tisnilsanin yesɛan yiwen n wummsil, maca unmiken mgaraden. Talɣiwin i d-yemmalen assaɣ-a, neqqar-asent taynisemt ».26 Akken-nniḍen, neqqar taynisemt mi ara d-yili sin n waynawalen a₁ + a₂ cudden ɣer yiwen wummsil, mgaraden deg unamek. Taynisemt tebḍa deg tilawt ɣef snat :

Taynudlift, tettili gar sin n wawalen i iɛedlen deg tira yemxalafen deg unamek.
Amedya, « ifer » ifer n useklu, ifer n wefrux… « ifer/iffer » ifer deg uxxam (tufra). Akked teyenmeslit i d-yettilin gar sin n wawalen i iɛedlen deg ususru yemgaraden deg tira amedya, « ger » deg ger isɣaren ɣer lkanun, « gar » deg gar yiḍ d wass.

Taggrayt

Ayen akka yettwaxedmen ar tizi n wass-a deg tesnawalt n tutlayt n tmaziɣt ladɣa tantala taqbaylit yezga yettabaɛ-it lixṣas, ttmagarent-id waṭas n wuguren d yiɛewwiqen. Iɛewwiqen-a rzan aswir asnalɣan akken rzan daɣen aswir asnamkan. Ssebbat n wanecta ugtent, ad d-nebder d amedya, amawal n tmaziɣt s umata neɣ taqbaylit s unamek usdid ar tura mazal yella wayen ur d-yettwajemɛen ara deg-s asaka n taɣult n tesmidegt. Ayen yeǧǧan simal ad d-nettemlil talɣiwin timaynutin ara d-yessegrayen s yisteqsiyen ɣef wayen yemmugen tazwara.

Deg tutlayin yettuqedmen yecban taglizit, tafṛansist, taɛṛabt, ugten yidlisen yemmugen ɣef tesnawalt n tutlayin-a. Idlisen-a yettwajmeɛ-d deg-sen akk wayen yurzen ɣer uzraw n wawal deg uswir n talɣa akked unamek. Imahilen s talɣa-a uqan deg taɣult n tmaziɣt.